ਸੱਟੇਬਾਜਾਂ ਨੇ ਸ਼ੁਰੂ ਕੀਤੇ ਦੀਵਾਲੀ ਸੱਟਾ ਸੁਵਿਧਾ ਕੇਂਦਰ
ਸੀਨੀਅਰ ਖਾਈਵਾਲਾਂ ਦੇ ਦਿਸ਼ਾ ਨਿਰਦੇਸ਼ਾਂ ਦੀ ਪਾਲਣਾ ਕਰਦੇ ਹੋਏ ਸੱਟਾ ਮਾਹਰਾਂ ਦੀ ਯੋਗ ਅਗਵਾਈ ਅਧੀਨ ਪਟਿਆਲਾ ਅਤੇ ਹੋਰ ਇਲਾਕਿਆਂ ਵਿਖੇ ਸੱਟੇਬਾਜ਼ਾਂ ਨੇ ਦੁਕਾਨਾਂ ਖੋਲ੍ਹ ਕੇ ਗਰੀਬਾਂ ਨੂੰ ਅਮੀਰ ਬਣਾਉਣ ਦੀ ਮੁਹਿੰਮ ਜੋਰਾਂ ਸ਼ੁਰੂ ਕਰ ਦਿੱਤੀ ਹੈ।
ਵਰਨਣ ਯੋਗ ਹੈ ਕਿ ਚੰਨੀ ਸਰਕਾਰ ਦੁਆਰਾ ਵੀ ਗ਼ਰੀਬਾਂ ਦੀ ਭਲਾਈ ਲਈ ਬਹੁਤ ਸਾਰੇ ਉਸਾਰੂ ਕਦਮ ਉਠਾਏ ਜਾ ਰਹੇ ਹਨ । ਹੁਣ ਗ਼ਰੀਬਾਂ ਦੇ ਭਲੇ ਲਈ ਪਟਿਆਲੇ ਦੇ ਖਾਈਵਾਲਾਂ ਅਤੇ ਸੱਟੇਬਾਜ਼ਾਂ ਨੇ ਵੀ ਆਪਣੀ ਕਮਰ ਕੱਸ ਲਈ ਹੈ। ਹਾਲਾਂਕਿ ਪੰਜਾਬ ਸਰਕਾਰ ਵੱਲੋਂ ਸੱਟੇ ਅਤੇ ਲਾਟਰੀ ਦੇ ਉੱਤੇ ਪੂਰੀ ਤਰ੍ਹਾਂ ਰੋਕ ਹੈ ਪਰ ਫੇਰ ਵੀ ਇਨ੍ਹਾਂ ਖਾਈਵਾਲਾਂ ਅਤੇ ਸੱਟੇਬਾਜ਼ਾਂ ਦੇ ਮਨ ਵਿੱਚ ਗ਼ਰੀਬਾਂ ਪ੍ਰਤੀ ਮਮਤਾ ਇਸ ਹੱਦ ਤੱਕ ਅੰਗੜਾਈਆਂ ਲੈ ਲੈ ਕੇ ਉੱਛਲ ਰਹੀ ਹੈ ਕਿ ਇਹ ਪਰਉਪਕਾਰੀ ਜੀਵ ਨਾ ਤਾਂ ਪੁਲੀਸ ਦੇ ਡੰਡੇ ਤੋਂ ਡਰਦੇ ਹਨ ਅਤੇ ਨਾ ਹੀ ਪੰਜਾਬ ਸਰਕਾਰ ਦੇ ਹੁਕਮਾਂ ਦੀ ਪ੍ਰਵਾਹ ਕਰਦੇ ਹਨ ।
ਪਟਿਆਲੇ ਦੇ ਰੇਲਵੇ ਸਟੇਸ਼ਨ ਨੇੜੇ, ਗੁਰਬਖਸ਼ ਕਾਲੋਨੀ, ਬੱਸ ਅੱਡਾ ਮਥੁਰਾ ਕਾਲੋਨੀ, ਹੀਰਾ ਬਾਗ ਵਗੈਰਾ ਕਈ ਹੋਰ ਥਾਵਾਂ ਵਿਖੇ ਸੱਟੇਬਾਜ਼ਾਂ ਨੇ ਗਰੀਬਾਂ ਦੇ ਕਲਿਆਣ ਲਈ ਸੁਵਿਧਾ ਸੈਂਟਰ ਖੋਲ੍ਹ ਦਿੱਤੇ ਹਨ ਜਿੱਥੇ ਲਾਲ,ਪੀਲੀਆਂ,ਚਿੱਟੀਆਂ ਪਰਚੀਆਂ ਵਾਲੀਆਂ ਕਾਪੀਆਂ ਅਤੇ ਲਿਖਣ ਸਮੱਗਰੀ ਦੇ ਨਾਲ ਲੈਸ ਮੁਸਤੈਦ ਕਰਿੰਦੇ ਸੈਨਤਾਂ ਮਾਰ ਮਾਰ ਕੇ ਰਿਕਸ਼ੇ ਰੇਹੜੀ ਵਾਲਿਆਂ ਅਤੇ ਦਿਹਾੜੀ ਕਰਨ ਵਾਲੇ ਮਜ਼ਦੂਰਾਂ ਨੂੰ ਬੁਲਾਉਂਦੇ ਹਨ ਅਤੇ ਪਰਚੀਆਂ ਦੇ ਉੱਤੇ ਮਨਭਾਉਂਦੇ ਨੰਬਰ ਲਿਖ ਕੇ ਸ਼ੇਖ ਚਿੱਲੀ ਦੇ ਸੁਪਨਿਆਂ ਵਰਗੀ ਅਮੀਰੀ ਦਾ ਅਨੰਦ ਲੈਣ ਲਈ ਉਨ੍ਹਾਂ ਦੇ ਹਵਾਲੇ ਕਰ ਦਿੰਦੇ ਹਨ। ਇਨ੍ਹਾਂ ਸੱਟੇਬਾਜ਼ਾਂ ਦਾ ਅਤੇ ਖਾਈਵਾਲਾ ਦਾ ਮੁੱਖ ਦਫਤਰ ਰਾਜਪੁਰਾ ਵਿਖੇ ਹੈ ਜਿੱਥੇ ਇਕ ਸਰਕਰਦਾ ਸੀਨੀਅਰ ਨਾਮੀ ਗਰਾਮੀ ਖਲੀਫਾ ਖਾਈਵਾਲ ਵੱਲੋਂ ਇਸ ਸਾਰੇ ਲਾਵ ਲਸ਼ਕਰ ਦਾ ਕੰਟਰੋਲ ਕੀਤਾ ਜਾਂਦਾ ਹੈ। ਪਿੱਛੇ ਜਿਹੇ ਪਟਿਆਲੇ, ਰਾਜਪੁਰੇ ,ਖੰਨੇ ਅਤੇ ਜ਼ੀਰਕਪੁਰ ਵਿਚ ਸੱਟਾ ਬੰਦ ਹੋ ਗਿਆ ਸੀ ਪਰ ਦੁਸਹਿਰੇ ਵਾਲੇ ਦਿਨ ਬੁਰਾਈ ਦੇ ਪ੍ਰਤੀਕ ਰਾਵਣ ਨੂੰ ਜਲਾਉਣ ਤੋਂ ਤੁਰੰਤ ਬਾਅਦ ਹੀ ਦੜਾ ਅਤੇ ਸੱਟਾ ਲਾਉਣ ਵਾਲੇ ਖਾਈਵਾਲਾਂ ਦੀਆਂ ਆਤਮਾਵਾਂ ਦੇ ਸੈੱਲ ਚਾਰਜ ਹੋ ਗਏ ਅਤੇ ਉਨ੍ਹਾਂ ਨੇ ਇਹ ਤਹੱਈਆ ਕਰ ਲਿਆ ਕਿ ਮਹਾਤਮਾ ਰਾਵਣ ਦੇ ਪਾਏ ਹੋਏ ਪੂਰਨਿਆਂ ਉੱਤੇ ਚੱਲਣ ਤੋਂ ਉਨ੍ਹਾਂ ਨੂੰ ਕੋਈ ਵੀ ਮਾਈ ਦਾ ਲਾਲ ਰੋਕ ਨਹੀਂ ਸਕਦਾ। ਇਸ ਸੰਬੰਧ ਵਿਚ ਜਦੋਂ ਰਾਜਪੁਰੇ ਦੇ ਇੱਕ ਖਾਈਵਾਲ ਅਤੇ ਸੱਟੇਬਾਜ਼ ਨਾਲ ਗੱਲ ਕੀਤੀ ਗਈ ਤਾਂ ਉਸ ਨੇ ਆਖਿਆ ਕਿ ਮੇਰੇ ਮਨ ਵਿੱਚ ਪੂਰੀ ਸ਼ਰਧਾ ਨਿਸ਼ਠਾ ਅਤੇ ਆਸਥਾ ਹੈ ਕਿ ਦੀਵਾਲੀ ਤੱਕ ਸਾਰੇ ਗਰੀਬ ਸੱਟੇਬਾਜਾਂ ਦੀ ਗਰੀਬੀ ਘੜੇ ਤੋਂ ਕੌਲੇ ਵਾਂਗ ਚੁੱਕ ਦੇਣੀ ਹੈ।ਬੁੱਕੀਆਂ ਨੇ ਵੀ ਸ਼ੇਰ ਵਾਂਗ ਬੁੱਕ ਬੁੱਕ ਕੇ ਬੁੱਕਾਂ ਲਾਉਣੀਆਂ ਸ਼ੁਰੂ ਕਰ ਦਿੱਤੀਆਂ ਹਨ ਜਿਨ੍ਹਾਂ ਬਾਰੇ ਪੁਲਿਸ ਨਿਊਜ਼ ਇੰਡੀਆ ਦੇ ਰਿਸਰਚ ਵਿੰਗ ਵੱਲੋਂ ਜਾਣਕਾਰੀ ਇਕੱਠੀ ਕੀਤੀ ਜਾ ਰਹੀ ਹੈ ਕਿ ਬੁੱਕ ਫੈਸਟੀਵਲ ਵਿਚ ਕਿਹੜੇ ਕਿਹੜੇ ਜੂਏਬਾਜ ਦੀਵਾ ਜਗਾਉਣ ਪਹੁੰਚਦੇ ਹਨ।
